ភ្នំពេញ៖ នាយករដ្ឋមន្ត្រីកម្ពុជា សម្តេច តេជោ ហ៊ុន សែន បានប្រកាសនៅក្នុងកិច្ចប្រជុំពេញអង្គគណៈរដ្ឋមន្ត្រី នៅវិមានសន្តិភាពនាព្រឹកថ្ងៃសុក្រ ទី៣១ ខែមីនា ថា ជនបរទេសក៏អាចចូលទស្សនាព្រឹត្តិការណ៍ស៊ីហ្គេមដោយមិនគិតថ្លៃផងដែរ។

រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានដកស្រង់ប្រសាសន៍របស់សម្តេចតេជោបែបនេះបង្ហោះនៅក្នុងគណនីផ្លូវការរបស់លោក ដោយបញ្ជាក់ថា៖«សម្តេចតេជោ ហ៊ុនសែន ប្រកាសអោយទាំងខ្មែរ ទាំងបរទេស មានសិទ្ធិចូលមើលកីឡា ស៊ីហ្កេម ដោយមិនបង់លុយទាំងអស់។ សហព័ន្ធកីឡាដែលចូលរួមក៏មិនត្រូវបង់លុយដែរ»។

តែយ៉ាងណា លោក ខៀវ កាញារីទ្ធ អះអាងថា ថ្វីដ្បិតសម្តេចបញ្ជាក់ថាមិនគិតថ្លៃសម្រាប់ចូលទស្សនាស៊ីហ្គេម ប៉ុន្តែក៏ត្រូវចាំបាច់ចែកសំបុត្រ ដើម្បីដឹងកន្លែងអង្គុយ និងច្រកចេញចូល។

ជាមួយគ្នានេះសម្តេចតេជោ ក៏បានបញ្ជាក់ថា ការផ្សាយរបស់ទូរទស្សន៍បរទេសនានាត្រូវទម្លាក់ថ្លៃ ឬឱ្យ free តែម្តង ព្រោះសំខាន់ផ្សព្វផ្សាយពីប្រទេសកម្ពុជា។

រដ្ឋមន្ត្រីក្រសួងព័ត៌មាន បានបញ្ជាក់បន្ថែមថា សម្តេចតេជោក៏បានបញ្ជាមិនឱ្យយកលុយពីទូរទស្សន៍បរទេសនានាដែលផ្សាយពីព្រឹត្តិការណ៍ស៊ីហ្កេមនៅកម្ពុជាឡើយ។

សម្ដេចបានគូសបញ្ជាក់តាមសារសំឡេងកាលពីល្ងាចថ្ងៃទី៣០ ខែមីនាថា រដ្ឋាភិបាលចំណាយលុយរាប់រយលានដុល្លារសម្រាប់ព្រឹត្តិការណ៍នេះ មិនសមហេតុផលថា ចង់បានលុយពីពលរដ្ឋលើការលក់សំបុត្រនេះឡើយ៕